Shkencëtarët në Japoni kanë identifikuar një shkak biologjik pas “mjegullës mendore” që përjetojnë shumë pacientë me Long COVID, një zbulim që mund të çojë drejt diagnostikimit dhe trajtimit të besueshëm.
Një ekip nga Universiteti i Qytetit Yokohama përdori një metodë të avancuar të imazherisë cerebrale për të zbuluar rritje jonormale të receptorëve AMPA (AMPAR) – molekula thelbësore për të mësuarit dhe kujtesën – tek personat e prekur nga Long COVID. Këto nivele të larta të receptorëve, të vëzhguara përmes imazherisë PET [11C]K-2, rezultuan të lidhura ngushtë me ashpërsinë e simptomave kognitive dhe shenjat inflamatore, duke ofruar shpjegimin e parë të qartë molekular të kësaj gjendjeje.
Rezultatet, të publikuara në Brain Communications, tregojnë se densiteti i receptorëve AMPAR jo vetëm që tregon ashpërsinë e mjegullës mendore, por gjithashtu lejon një dallim pothuajse të përsosur mes individëve të prekur dhe atyre të shëndetshëm — me sensitivitet 100% dhe specifitet 91%. Kjo ofron shpresë për zhvillimin e mjetëve diagnostikuese dhe trajtimeve të synuara, si ilaçe që shtypin aktivitetin e AMPAR.
Me mjegullën mendore që prek mbi 80% të të sëmurëve nga Long COVID në mbarë botën, ky studim përfaqëson një hap domethënës drejt njohjes së plotë të gjendjes dhe përshpejtimit të përpjekjeve për trajtim me terapi të fokusuara.
