Fermerët e fushës së Maliqit, veçanërisht në fshatrat Pirg dhe Zvirinë, po përballen me vështirësi të mëdha në shitjen e prodhimeve bujqësore.
Prodhimi i qepës ka mbetur i pashitur, ndërsa për shkak të mungesës së tregut, sasi të konsiderueshme po dëmtohen dhe përfundojnë duke u hedhur. Sipas fermerëve, çmimi që ofrohet aktualisht nga tregtarët, rreth 20 lekë për kilogram, është tepër i ulët dhe nuk mbulon kostot e prodhimit.
Ata theksojnë gjithashtu se kërkesa në treg është e dobët, kryesisht si pasojë e rritjes së importeve, të cilat po konkurrojnë drejtpërdrejt prodhimin vendas.
Të zhgënjyer nga kjo situatë, disa prej fermerëve kanë ndërmarrë protesta simbolike, duke hedhur prodhimin në parcela dhe kanale, si shenjë revolte ndaj kushteve të vështira në sektorin bujqësor.
Fermerët i bëjnë thirrje shtetit të ndërhyjë, duke mbështetur prodhimin vendas dhe duke krijuar kushte më të favorshme për tregtimin e produkteve bujqësore në tregun vendas.
