Pas një muaji agjërimi dhe sakrifice gjatë Ramazani, besimtarët myslimanë festojnë sot Fitër Bajramin. Mijëra besimtarë u mblodhën në sheshin Skënderbej për të kryer ritet fetare dhe për të falur Namazin e Bajramit. Fitër Bajrami është festa që shënon përfundimin e muajit të shenjtë të Ramazanit. Emri lidhet me traditën e dhënies së lëmoshës para ditës së Bajramit, një akt solidariteti me familjet në nevojë, në mënyrë që festa të kremtohet nga të gjithë.
Pas 30 ditësh agjërimi, lutjeje, përkushtimi dhe pastrimi shpirtëror, besimtarët myslimanë në Shqipëri dhe në mbarë botën shënojnë sot një nga festat më të rëndësishme të kalendarit islam.
Në përfundim të ceremonisë, kreu i Komuniteti Mysliman të Shqipërisë Bujar Spahia, përcolli edhe mesazhin e tij për besimtarët. Ai e fokusoi urimin te paqja dhe solidariteti, duke theksuar se lutjet shkojnë për të gjithë ata që vuajnë nga luftërat, për fëmijët që rriten mes frikës dhe për popujt që kërkojnë paqe dhe drejtësi.
