Një ditë pas reagimit të banorëve që jetojnë pranë zonës së depozitimit të mbetjeve të rrezikshme industriale, specialistë të mjedisit konfirmojnë se shqetësimet e ngritura janë të justifikuara. Sipas tyre, kontenierët ku janë vendosur mbetjet janë të ekspozuar ndaj kushteve atmosferike dhe mund të dëmtohen, duke rritur rrezikun për mjedisin dhe shëndetin publik.
Analizat laboratorike të kryera në Itali kanë konfirmuar se mbetjet industriale të rikthyera në Shqipëri dhe të depozituara në Porto Romano janë toksike dhe përbëjnë rrezik serioz, me ndikim të drejtpërdrejtë si në shëndetin e njeriut, ashtu edhe në mjedis. Ekspertët theksojnë se këto mbetje nuk mund të depozitohen apo riciklohen në gjendjen aktuale, por kërkojnë trajtim të specializuar përpara çdo forme depozitimi përfundimtar, në përputhje me standardet ndërkombëtare.
Në këtë situatë, specialistët kërkojnë marrjen e një vendimmarrjeje të shpejtë për trajtimin e mbetjeve, si dhe zgjerimin e hetimeve për të zbardhur fatin e sasive të konsiderueshme të mbetjeve të rrezikshme, të krijuara ndër vite nga aktiviteti i kompanisë Kurum, por edhe nga veprimtari të tjera industriale në vend.
Ndërkohë, pavarësisht se hetimi penal ka zbuluar një zinxhir shkeljesh dhe ka çuar në kërkimin e masave të sigurimit për 33 persona, mbi 2800 ton mbetje të rrezikshme vijojnë të qëndrojnë në Porto Romano, pa një vendim të qartë mbi mënyrën dhe vendin e trajtimit të tyre. Për banorët e zonës dhe opinionin publik, çështja ka tejkaluar kufijtë e drejtësisë penale, duke u shndërruar në një kërcënim real për shëndetin, jetën dhe ekosistemin.
