Pedagogia Xhoi Jakaj, e njohur për rolin e kryetares së bashkisë në filmin “Pallati 69”, ka deklaruar se është e gatshme të kandidojë realisht për Bashkinë e Tiranës.
E ftuar në emisionin “Dita jonë”, Jakaj tha se ka aspiruar prej vitesh të angazhohet në politikë dhe se mendon se qytetet kryesore të vendit duhet të drejtohen nga figura jopartiake.
“Pse jo? Do të ishte mirë. Kam aspiruar pjesëmarrjen në politikë prej vitesh. Jam larguar pak nga politika dhe ndoshta duhet të jesh shumë në politikë aktive që të të shohin si personazh. Por unë mendoj që Tirana, Shkodra, Vlora dhe Durrësi duhet të kenë një kryebashkiak jopartiak”, – u shpreh ajo.
Jakaj tregoi gjithashtu se dikur ka qenë në listën e mundshme të kandidaturave për Bashkinë e Pukës, qyteti i saj i lindjes, duke shtuar me humor se “do ta bënte më të bukur se Tiranën” falë klimës, ujit dhe njerëzve të thjeshtë e bujarë të zonës.
“Unë e hodha, le ta marrë kush të dojë. Varet a më shohin si kandidaturë e mundur”, – tha ajo.
Xhoi Jakaj, e cila është mamaja e modeles së njohur Oriola Marashi, e mbylli me një mesazh të qartë: nëse shikohet si alternativë serioze, është e gatshme të sfidojë realitetin politik, ashtu siç e ka interpretuar në kinema.
