Një 35-vjeçar është arrestuar nga Policia e Tiranës, pasi u kap duke tregtuar produkte bujqësore të skaduara, të cilave iu kishte ndryshuar në mënyrë të paligjshme afati i përdorimit. Si rezultat i këtij operacionit, u arrestua në flagrancë shtetasi E. D., 35 vjeç, banues në fshatin Krutje, Lushnjë.
Nga hetimet e deritanishme dyshohet se ky shtetas kishte shitur një sasi të konsiderueshme produktesh bujqësore për mbrojtjen e bimëve, të cilave iu kishte shtyrë artificialisht afatin e skadencës, duke vendosur etiketa të reja me data të rreme.
Kontrollet e kryera në bashkëpunim me punonjësit e AKU-së zbuluan në magazinën e tij, në zonën e Fushë-Krujës, një sasi të madhe produktesh bujqësore, të cilat kishin afat përdorimi 2 vjet nga data e prodhimit, por që ishin rishënuar me etiketa të reja që tregonin afat përdorimi 3 vjet nga data e prodhimit.
Gjatë kontrollit u sekuestruan në cilësinë e provës materiale qindra etiketa ngjitëse, në të cilat ishte ndryshuar në mënyrë të paligjshme afati i përdorimit të produkteve bujqësore, si dhe një sasi e konsiderueshme produktesh të skaduara.
