Kuvendi i Shqipërisë pritet të miratojë nesër projektligjin “Për Barazinë Gjinore”, ndërsa kundërshtitë nga komunitetet fetare dhe organizatat pro-familjes janë shtuar në prag të votimit.
Këshilli Ndërfetar i Shqipërisë (KNFSH) ka përsëritur sot qëndrimin e tij zyrtar kundër projektligjit, duke theksuar rëndësinë e ruajtjes së vlerave themelore të familjes, traditës morale dhe shoqërore shqiptare, si dhe parimeve të besimeve fetare.
Në deklaratën e shpërndarë për mediat, KNFSH nënvizon se mbetet i përkushtuar ndaj dialogut me institucionet shtetërore dhe shoqërinë civile, me qëllim forcimin e harmonisë ndërfetare dhe ndërtimin e një shoqërie “të drejtë, të barabartë dhe të qëndrueshme”.
“Zoti e bekoftë Shqipërinë dhe të gjithë qytetarët e saj!”, përfundon deklarata e Bordit të Presidencës së KNFSH-së.
Në të njëjtën linjë qëndrimi, Koalicioni Shqiptar “Pro Familjes & Jetës” ka njoftuar zhvillimin e një tubimi paqësor nesër, më 6 nëntor, në orën 09:30 përpara Kuvendit të Shqipërisë.
Organizatorët deklarojnë se protesta ka për qëllim “mbrojtjen e vlerave familjare dhe të drejtës për t’u rritur në një shoqëri që respekton familjen si themel të saj”.
Në thirrjen publike, koalicioni u bën apel qytetarëve të bashkohen për të “qëndruar bashkë për familjen dhe fëmijët”, duke e cilësuar projektligjin si një rrezik për vlerat tradicionale të familjes shqiptare.
“Familja është themeli i shoqërisë dhe çdo përpjekje për ta zëvendësuar apo relativizuar atë duhet të ndalet,” thuhet në deklaratën e tyre.
Projektligji për Barazinë Gjinore pritet të ngjallë debat të gjerë në seancën plenare të së enjtes, mes përkrahësve që e konsiderojnë hap drejt barazisë reale dhe kundërshtarëve që e shohin si cenim të vlerave tradicionale.
