Në Shqipëri paska dhe një profesion të ri që quhet: “ekspert i zhvillimit të biznesit”. Personazhi në fjalë quhet Albana Murra, dhe mbrëmë në “Top Story” ka deklaruar se djalin e saj e ka çuar në shkollë private në Spanjë, në mënyrë që mos t’i ndikohet në shkollat publike fryma e martesës mes dy gjinive të njëjta.
Se çfarë lidhje ka shkolla publike me agjendën LGBT vështirë të kuptohet. E rëndësishme është që Albana na ka dhënë mbrëmë një leksion: si të ruajmë fëmijët nga kjo agjendë dhe për këtë na duhet t’i çojmë në shkolla private. Mirë do ishte që veç kësaj, si eksperte e fushës, të na tregonte edhe se si të mundemi të sigurojmë paratë për këtë, pasi në Shqipëri një shkollë private nis nga 10 mijë euro në vit e më shumë.
Përpos faktit që këto deklarata të zhurmshme më shumë se të vërteta fshehin dëshirën e madhe për protagonizëm. Sa për sqarim, meqë zonja pretendon se i përket të djathtës, ndoshta është mirë të kuptojë se edukimi i fëmijëve nis nga familja. Ajo është baza ku merret edukata, e sa për shkollën, publike apo private, në një shoqëri ku sundon ligji i xhunglës vështirë të gjesh shkollë dhe mësues që të të edukojnë fëmijët sipas preferencave.
Për të mos folur pastaj për mendjengushtësinë e dikujt që i vesh vetes titullin e ekspertes dhe flet si dikush me formim nënmesatar.
