Këshilli Ndërfetar i Shqipërisë, që përfaqëson pesë komunitetet kryesore fetare në vend — Katolikët, Ortodoksët, Myslimanët, Bektashinjtë dhe Vëllazërinë Ungjillore — ka nxjerrë një deklaratë të përbashkët mbi situatën dramatike humanitare në Gaza dhe Bregun Perëndimor. Në dokument kërkohet përfundimi i menjëhershëm i luftës, lirimi i të gjithë pengjeve, ndalimi i dhunës dhe mbrojtja e jetës së civilëve, veçanërisht grave dhe fëmijëve, si dhe sigurimi i ndihmës humanitare.
Ky dokument ka një rëndësi të veçantë: për herë të parë, Kryetari i Komunitetit Mysliman dhe Kryegjyshi Botëror i Bektashinjve kanë “folur” për Gazën, në kuptimin që ata kanë firmosur deklaratën. Megjithatë, ata nuk kanë shprehur ende një qëndrim personal, publik dhe zyrtar. Deklarata reflekton solidaritetin ndërfetar dhe gatishmërinë e të gjithë komuniteteve fetare shqiptare për të ndërmarrë hapa për paqe dhe drejtësi.
Bordi i Presidencës së Këshillit Ndërfetar të Shqipërisë, që përbëhet nga përfaqësuesit e të gjitha pesë komuniteteve, riafirmon se paqja e qëndrueshme ndërtohet mbi drejtësi, mëshirë dhe respekt të ndërsjellë, dhe u bën thirrje botës për përpjekje të përbashkëta drejt një zgjidhjeje të drejtë dhe humanitare në Tokën e Shenjtë.
Postimi i plotë
#Deklaratë_për_shtyp
Këshilli Ndërfetar i Shqipërisë, si përfaqësues i pesë komuniteteve fetare të vendit, ka ndjekur me vëmendje ndër vite çdo shqetësim kombëtar dhe ndërkombëtar, që ka cenuar paqen sociale dhe bashkëjetesën shoqërore. Sot, ne komunitetet fetare në Shqipëri, bashkojmë zërin tonë me thirrjet ndërkombëtare të organizatës Religions for Peace Europe, institucion ku ne bëjmë pjesë, thirrjes së fundit të Patriarkanës Latine dhe asaj Ortodokse të Jeruzalemit, thirrjes së 80 rabinëve ortodoksë nga e gjithë bota, komuniteteve islame dhe të krishtera nga mbarë bota, OKB-së dhe institucioneve të tjera ndërkombëtare, ku me apelin e tyre, ata shprehin shqetësimin e thellë për situatën dramatike humanitare në Gaza dhe Bregun Perëndimor, duke kërkuar përfundimin e menjëhershëm të luftës dhe lirimit të të gjithë pengjeve.
KNFSH kërkon ndalimin e dhunës dhe garantimin e mbrojtjes së jetës së civilëve të pafajshëm, veçanërisht grave dhe fëmijëve, të cilët janë viktimat më të mëdha të këtij konflikti. Shpërngulja e detyruar e popullsisë, pengimi i ndihmës humanitare dhe shkatërrimi i infrastrukturës bazë nuk mund të justifikohen në asnjë mënyrë dhe përbëjnë një shkelje të rëndë të dinjitetit njerëzor.
Në frymën e solidaritetit ndërfetar dhe të përgjegjësisë morale që feja mbart, Këshilli Ndërfetar i Shqipërisë riafirmon se paqja e qëndrueshme mund të ndërtohet vetëm mbi drejtësi, mëshirë dhe respekt të ndërsjellë.
Ne u bëjmë thirrje udhëheqësve botërorë, institucioneve ndërkombëtare dhe të gjithë njerëzve të vullnetit të mirë të shtojnë përpjekjet për t’i dhënë fund konfliktit, për të siguruar menjëherë ndihmën e nevojshme humanitare dhe për të hapur rrugën drejt një paqeje të drejtë e të qëndrueshme në Tokën e Shenjtë dhe përreth saj.
Zoti i bekoftë paqendërtuesit!
Bordi i Presidencës së Këshillit Ndërfetar të Shqipërisë:
Mons. Gjergj Meta, President i Konferencës Ipeshkvnore të Shqipërisë, Kryetar i KNFSH-së
H. Bujar Spahiu, Kryetar i Komuniteti Mysliman të Shqipërisë
Fortlumturia e Tij Joani, Kryepeshkop i Kishës Ortodokse Autoqefale të Shqipërisë
H. Dede Edmond Brahimaj, Kryegjysh Botëror i Bektashinjve
Pastor Ergest Biti, Kryetar i Vëllazërisë Ungjillore të Shqipërisë
