Greva e minatorëve në Minierën e Bakrit në Spaç ka hyrë në ditën e saj të katërt, mes kërkesave të punëtorëve për përmirësim të kushteve të punës dhe mos reagimit të kompanisë "Tete Albania".
Minatorët janë mbledhur që në orët e para të mëngjesit të sotëm, për të vijuar protestën e tyre të nisur me qëllim përmirësimin e kushteve të punës, sigurimin e të drejtave ekonomike dhe garantimin e trajtimit me dinjitet. Ata deklarojnë se janë të gatshëm të ulen në tryezën e dialogut, por gjithashtu të vendosur për të përshkallëzuar veprimet e tyre nëse kërkesat nuk merren në konsideratë.
"Jemi këtu për të kërkuar të drejtën për të punuar e jetuar me dinjitet. Greva jonë është paqësore dhe e mbështetur mbi të drejta të ligjshme, njerëzore dhe zakonore", deklaruan përfaqësues të minatorëve.
Ndërkohë, edhe sot shihet prezenca e Forcave të Ndërhyrjes së Shpejtë pranë ambienteve të kompanisë që protestuesit e konsiderojnë si përpjekje për presion dhe intimidim psikologjik. Minatorët theksojnë se sjellja e autoriteteve nuk përputhet me standardet demokratike dhe frymën europiane që vendi synon të arrijë.
Përfaqësues të sindikatës dhe mbështetës të kauzës së tyre kanë bërë thirrje për solidaritet nga qytetarët dhe institucionet, duke theksuar rëndësinë e mbrojtjes së të drejtave të punëtorëve, veçanërisht në sektorë të vështirë si ai minerar.
Deri në këto momente, nuk ka pasur një reagim zyrtar nga kompania “Tete Albania” apo institucionet shtetërore lidhur me kërkesat e minatorëve.
