Vetëm pak ditë pasi Spitali Rajonal i Durrësit publikoi një reagim triumfues duke folur për rast suksesi, jetë të shpëtuar dhe duke lavdëruar ekipin kirurgjikal për ndërhyrjen e kryer tek 15-vjeçari i plagosur me thikë, sot institucioni është detyruar të dalë me një deklaratë të re, këtë herë për t’u justifikuar.
Në deklaratën e 26 nëntorit, spitali fliste për një operacion të suksesshëm, stabilizim hemodinamik dhe profesionalizëm maksimal.
"Reagim i shpejtë i pastër pa humbur asnjë minut. Ekip i fortë, jetë e shpëtuar" deklaronte spitali
Por sot, kur pacienti nuk jeton më, toni ndryshon tërësisht.
Në deklaratën e sotme, spitali shpreh ngushëllime dhe thekson se i mituri ishte paraqitur në gjendje “jashtëzakonisht të rëndë”
Sot flet për “shok traumatik-hemorragjik” dhe “arrest kardiak traumatik si dhe nxiton të mohojë pretendimet se gjatë ndërhyrjes “kanë ikur dritat”, duke i quajtur lajme të pasakta
Në deklaratë spitali thekson se gjeneratorët funksionojnë automatikisht dhe pajisjet kanë bateri rezervë si dhe sqaron se edhe ashensorët janë funksionalë dhe me kontratë mirëmbajtjeje
Pra, nga një komunikim triumfal për një “jetë të shpëtuar”, spitali sot ka kaluar në një rreshtim deklaratash mbrojtëse, duke u përpjekur të largojë nga vetja çdo përgjegjësi. A është fjala për paaftësi, për një reagim PR-i, apo thjesht për një përpjekje për të shmangur përgjegjësinë pasi historia mori fund tragjik?
