Një situatë problematike e infrastrukturës urbane në Zonën e 21-shit në Tiranë ka rikthyer në vëmendje çështjen e sigurisë publike dhe standardeve teknike në kryeqytet. Kabllot e operatorëve të internetit, telefonisë dhe energjisë elektrike shihen të vendosura në mënyrë të çrregullt, të ekspozuara dhe pa mbrojtje të dedikuar, duke krijuar një rrjet kaotik mbi fasada dhe përgjatë rrugëve të lagjes.
Sipas ekspertëve të sigurisë, kjo situatë përbën rrezik potencial për zjarr, qark të shkurtër dhe aksidente për këmbësorët, ndërsa vështirëson ndjeshëm edhe ndërhyrjet emergjente. Çdo ndërhyrje e re teknike është shtuar mbi instalimet ekzistuese, pa një standard të unifikuar dhe pa koordinim të plotë institucional.
Disa vite më parë, Bashkia Tiranë ndërmori një aksion për sistemimin e kabllove ajrore dhe eliminimin e të ashtuquajturave “rrjeta merimangë”, por banorët e zonës shprehen se problematika është rikthyer, duke dëshmuar mungesë monitorimi dhe qëndrueshmërie në zbatimin e masave.
Një tjetër shqetësim mbetet parkimi kaotik, i cili ka ngushtuar rrugët dhe mund të pengojë kalimin e mjeteve të emergjencës në raste zjarri, tërmeti apo urgjencash mjekësore. Sipas specialistëve, çdo minutë në situata të tilla është jetike dhe infrastruktura aktuale mund të shkaktojë vonesa të rrezikshme.
Eksperti i sigurisë, Fatjon Softa, thekson se çështja nuk është vetëm urbanistike, por lidhet drejtpërdrejt me sigurinë publike dhe përgjegjësinë institucionale. Ai propozon vendosjen e një standardi unik teknik për instalimet, kontroll periodik me penalitete për shkelësit, planifikim të mirëfilltë të parkimeve në zonat e dendura dhe inspektim të detyrueshëm të objekteve të amortizuara.
Ndërkohë, banorët kërkojnë ndërhyrje konkrete dhe afatgjata, duke theksuar se siguria në lagje nuk duhet të mbetet në nivel aksionesh sporadike, por të trajtohet si prioritet i përhershëm i administrimit urban.
