Pas javësh raportimesh dhe shqetësimesh publike mbi sigurinë e disa ndërtesave në projektin “Durrës Marina”, vetë Inspektorati Kombëtar për Mbrojtjen e Territorit ka pranuar zyrtarisht se dy prej objekteve kanë pësuar ulje të konsiderueshme strukturore.
Në një deklaratë zyrtare, IKMT bën të ditur se, me urdhër të Kryeinspektorit, është ngritur një grup i posaçëm inspektimi ku kanë marrë pjesë inspektorë të IKMT-së, përfaqësues të Agjencisë së Zhvillimit të Territorit, IMT-së së Bashkisë Durrës dhe specialistë të Institutit të Ndërtimit.
Verifikimet janë kryer për dy objekte në zonat A02 dhe A04 të projektit “Durrës Marina”, aktualisht në fazën e sistemimeve të jashtme. Sipas raportit topografik të Institutit të Ndërtimit, objekti 02 ka pësuar një ulje prej 28 centimetrash, ndërsa objekti 04 një ulje prej 18 centimetrash.
Pikërisht këto konstatime kanë detyruar IKMT-në t’i kërkojë zyrtarisht kompanisë zbatuese marrjen e menjëhershme të masave për projekt-përforcime teknike që duhet të garantojnë qëndrueshmërinë e strukturave.
Megjithëse institucioni përpiqet ta paraqesë situatën si të menaxhueshme dhe nën mbikëqyrje, deklarata përbën pranimin e parë publik se në një nga projektet më të mëdha dhe më të promovuara në vend ekzistojnë probleme serioze që lidhen me stabilitetin e objekteve.
Fakti që ndërhyrjet për përforcim kërkohen ndërsa objektet janë ende në fazë ndërtimi ngre pikëpyetje të forta mbi kontrollin teknik, standardet e zbatimit dhe sigurinë afatgjatë të investimit që është reklamuar si një nga projektet më ambicioze në bregdetin shqiptar.
