Moderatorja sportive Hygerta Sako ka reaguar sot pas debatit të ngritur një ditë më parë nga klubi i Burrelit dhe presidenti i skuadrës, lidhur me momentin e qeshurës gjatë intervistës me futbollistin Arnold Kwaku Siaw në emisionin “Super Gol”.
Në deklaratën e saj, Sako tha se situata është keqinterpretuar dhe se portale të ndryshme e kanë publikuar videon pa e kontaktuar për sqarim.
“Unë jam realisht profesioniste, një njeri që dua t’i jap secilit hakun, dua ta respektoj këdo që i sjell diçka të bukur futbollit. Në momentin që unë denigrohem si figurë profesionale dhe gazetare për një gjë që nuk më ka rënë një telefon nga të gjitha këto portale kaq të ndjeshme të më pyesin se çfarë ndodhi në atë studio dhe pse qeshëm… askush,” tha ajo.
Sipas saj, reagimet në rrjet janë ndërtuar për klikime dhe nuk kanë marrë parasysh rrethanat reale të momentit.
Ndërkohë, futbollisti Arnold Kwaku Siaw, i cili ishte në lidhje direkte gjatë incidentit, është shprehur se është “në rregull” me situatën, ndërsa klubi i Burrelit reagoi dje duke e cilësuar episodin si mungesë respekti ndaj lojtarit.
Reagimi i sotëm i Sakos vjen një ditë pasi çështja u bë virale dhe u komentua gjerësisht në rrjetet sociale.
