Në qytetin e Lezhës është mbajtur këtë të diel një homazh në kujtim të 25-vjeçares Xhuana Nikolli, e cila humbi jetën në rrethana tragjike, duke lënë pas dhimbje të madhe në familje dhe komunitet.
Dhjetëra qytetarë, familjarë dhe të afërm u mblodhën për të nderuar kujtimin e së resë, duke ndezur qirinj dhe duke shprehur solidaritet me familjen e saj në këto momente të vështira. Mes emocioneve të forta dhe lotëve, familjarët e Xhuanës kërkuan që autoritetet të zbardhin plotësisht ngjarjen dhe përgjegjësit të përballen me drejtësinë. Motrat e saj apeluan për një hetim të plotë dhe të paanshëm nga ana e policisë dhe prokurorisë.
Të pranishmit në homazh bënë thirrje për më shumë vëmendje institucionale dhe shoqërore ndaj rasteve të dhunës dhe kërcënimeve ndaj vajzave dhe grave, duke theksuar se ngjarje të tilla nuk duhet të kalojnë në heshtje.
Në nder të 25-vjeçares u mbajt edhe një minutë heshtje, ndërsa mesazhi “Drejtësi për Xhuanën” u përsërit nga pjesëmarrësit gjatë gjithë aktivitetit.
