Autoritetet franceze të shëndetësisë kanë urdhëruar tërheqjen e menjëhershme nga tregu të një serie djathërash të butë, pas një shpërthimi rastesh të listeriozës, i cili ka prekur 21 persona në moshat 34–95 vjeç. Sipas Agjencisë Franceze të Shëndetit Publik, dy prej të prekurve kanë ndërruar jetë.
Hetimet fillestare tregojnë se infeksioni dyshohet të jetë i lidhur me konsumin e djathërave të prodhuara nga kompania Chavegrand, të cilat përdorin qumësht të pasterizuar. Djathërat e kontaminuar janë shpërndarë jo vetëm në supermarkete të mëdha brenda Francës, por edhe në rreth 30 vende të tjera, përfshirë Shqipërinë, Mbretërinë e Bashkuar, Norvegjinë, Belgjikën, Danimarkën dhe shumë shtete të tjera.
Listerioza është një infeksion serioz, veçanërisht i rrezikshëm për gratë shtatzëna, të moshuarit dhe personat me sistem imunitar të dobësuar. Simptomat mund të përfshijnë ethe, dhimbje muskujsh, të përziera, dhe në raste të rënda edhe meningjit.Autoritetet franceze të shëndetësisë kanë bërë thirrje të forta për të mos konsumuar djathrat e tërhequr nga tregu dhe të monitorojnë nga afër shëndetin e tyre nëse i kanë konsumuar kohët e fundit. Në paralajmërim për publikun, zyrtarët nënvizojnë rëndësinë e kujdesit të veçantë ndaj grupmoshave më të ndjeshme dhe personave me sëmundje kronike ose sistem imunitar të dobësuar.
Hetimet për burimin e saktë të infeksionit dhe masat për të parandaluar shpërndarjen e mëtejshme të produkteve të kontaminuara vazhdojnë, ndërsa autoritetet po koordinojnë veprimet me partnerët ndërkombëtarë ku djathërat janë shpërndarë.
