Pas vendimit të Gjykatës së Tiranës që dënoi me 16 vite burg të miturin për vrasjen e Martin Canit dhe plagosjen e Luis Mecajt, ka reaguar edhe familja e viktimës përmes një deklarate për shtyp, ku shprehet se drejtësia më në fund ka folur qartë.
“Sot, pas një viti dhimbjeje që nuk përshkruhet me fjalë, ne — familja e Martin Canit — kemi parë për herë të parë një rreze të fortë drejtësie”, thuhet në deklaratë.
Familja vlerëson faktin që gjykata nuk ndoqi rekomandimin e Prokurorisë, e cila e kishte trajtuar ngjarjen si një vepër të vetme penale, por e njohu atë si dy vepra të ndara: vrasjen e Martinit dhe tentativën e vrasjes ndaj Luisit.
“Ky vendim është një akt kurajoz, profesional dhe i drejtë. Është një vlerësim real i asaj që ndodhi: dy fëmijë të goditur me thikë, dy akte të veçanta dhune, dy qëllime kriminale të ndara”, shprehet familja Cani.
Në reagim, ata falënderojnë trupën gjykuese për integritetin dhe ndershmërinë e treguar gjatë procesit, duke theksuar se vendimi nuk ua kthen djalin, por u jep ndjesinë se jeta e Martinit u trajtua me peshën dhe dinjitetin që meritonte.
“Ky vendim nuk na e kthen dot Martinin, por na jep një ndjenjë të thellë se dhimbja jonë nuk u shpërfill dhe se jeta e tij u trajtua me dinjitet”, thuhet në deklaratë.
Familja Cani bën të ditur gjithashtu se do të vijojë misionin në kujtim të Martinit përmes tre nismave konkrete: krijimin e Muzeut “Martin Cani” si një vend kujtese dhe edukimi, realizimin e një filmi për jetën e tij dhe themelimin e Fondacionit “Martin Cani”, i cili do të angazhohet për sigurinë e fëmijëve në shkolla.
Në fund, familjarët falënderojnë qytetarët për mbështetjen e vazhdueshme dhe përmbyllin reagimin me mesazhin: “Sot, drejtësia foli me zë të qartë për Martin Canin”.
