Autoritetet kanë urdhëruar evakuimin e menjëhershëm të banorëve në Bashkinë Vlorë, Njësia Administrative Novoselë, si pasojë e situatës së rënduar nga përmbytjet dhe rrezikut të drejtpërdrejtë për jetën dhe shëndetin e qytetarëve.
Vendimi është marrë në zbatim të Ligjit nr. 45/2019 “Për Mbrojtjen Civile”, Planit Kombëtar të Emergjencave Civile dhe planeve vendore të emergjencave, ndërsa procesi po koordinohet nga Agjencia Kombëtare e Mbrojtjes Civile, Prefekti i Qarkut dhe strukturat e emergjencave në bashki.
Sipas legjislacionit në fuqi, Kryetari i Bashkisë është autoriteti përgjegjës për urdhërimin e evakuimit në territorin administrativ. Autoritetet u bëjnë thirrje qytetarëve të ndjekin udhëzimet në terren dhe të bashkëpunojnë me strukturat shtetërore.
Prioritet në evakuim u jepet: fëmijëve,
të moshuarve, personave me aftësi të kufizuara,
familjeve që ndodhen në zona të izoluara.
Transporti për evakuimin po sigurohet nga mjetet e bashkisë, Shërbimi i Mbrojtjes nga Zjarri dhe Shpëtimi (MZSH) si dhe Forcat e Armatosura.
