I diskutuar si një nga opsionet kryesore të opozitës për garën e ardhshme zgjedhore në Tiranë, Ermal Hasimja është shfaqur sot në një tjetër status. Ai është shpërblyer me çmimin “At’ Gjergj Fishta” për prozën më të mirë për romanin e tij “E shkuar e pakryer”; historia e vërtetë e romanizuar e gjyshërve të tij gjakovarë të ndarë gjatë gjithë komunizmit mes Gjakovës e Tiranës.
Paralelisht me dramat njerëzore, të ngjashme me ato të qindra familjeve shqiptare gjatë diktaturës, romani i Hasimes flet për një “Alzajmer” kolektiv që tret kuptimin e komunizmit, si dhe kujtesën, me rrezikun e madh të relativizimit të së keqes dhe shplarjen e përgjegjësive.
Juria e konkursit përbëhej nga Rudolf Marku, Ernestina Halili dhe Bajram Kosumi. Aktiviteti mbështetet çdo vit nga Bashkia e Lezhës dhe është një nga eventet më serioze në fushën e letërsisë shqiptare.
