Detaje të reja janë zbardhur lidhur me ngjarjen e ndodhur ditën e djeshme pranë Komisariatit të Policisë nr. 3 në Tiranë, ku dy gra kanë ushtruar dhunë ndaj një punonjëseje policie.
Dy të arrestuarat, M. A., 38 vjeçe dhe R. A., 29 vjeçe, janë motra. Konflikti mes tyre dhe efektives ka nisur për një arsye banale.
Sipas raportimeve, në momentin e ngjarjes motrat po lëviznin me automjet, ndërsa efektivja e policisë, agjente e krimeve, ishte e veshur civile dhe po kalonte rrugën për t’u futur në ambientet e komisariatit. Motrat kanë nisur ta ofendojnë duke i bërtitur se “nuk sheh kur kalojnë ato rrugën”.
Pas përplasjes verbale, ato kanë parkuar automjetin dhe i kanë zënë pritë efektives pak metra larg komisariatit. Policia i ka paralajmëruar që të ndalonin dhe u ka bërë me dije se ishte punonjëse policie, por motrat nuk e kanë besuar.
“O qorre, nuk sheh ti kur kalojmë ne? Kë gënjen ti?”, mësohet të kenë thënë ato, përpara se situata të përshkallëzohej në dhunë fizike.
Ngjarja ka përfunduar me arrestimin e dy motrave, ndërsa materialet procedurale i janë referuar Prokurorisë për veprime të mëtejshme ligjore.
