Aktivistë dhe përfaqësues të komunitetit të prindërve janë përballur sot me refuzimin e drejtueses së shkollës “Fan Noli” për të lejuar vendosjen e një stoli në kujtim të Martin Canit, 14-vjeçarit që u vra nga një bashkëmoshatar pranë kësaj shkolle.
Sipas tyre, hyrja është bllokuar me argumentin se mungon leja për vendosjen e stolit, ndonëse prindërit dhe aktivistët pretendojnë se iniciativa është miratuar në mbledhjen e Këshillit Bashkiak dhe ka marrë dakordësinë edhe nga zyra arsimore.
Aktivistja Sideorela Vatnikaj shprehu zhgënjimin për situatën, duke deklaruar se drejtoresha nuk ka dalë të komunikojë, por ka thirrur policinë për t’i larguar. Sipas saj, në vendngjarje kanë qenë të pranishëm edhe prindërit e Martin Canit, të cilët, siç theksoi ajo, përveç se nuk kanë marrë drejtësi për humbjen e djalit, po përballen edhe me pengesa burokratike.
“Jemi shumë të zhgënjyer dhe të lënduar që kjo çështje po zvarritet. Na është thënë se drejtoresha nuk ka dalë asnjë moment, por ka thirrur policinë për të na larguar me forcë. Nuk na është dhënë asnjë arsye pse nuk duhet të vendoset stoli, ndërkohë që Këshilli Bashkiak dhe zyra arsimore e kanë miratuar,” u shpreh Vatnikaj.
Ajo shtoi se drejtuesja e shkollës, si përgjegjëse për sigurinë e nxënësve, duhej të ishte e para e interesuar për një akt simbolik që, sipas saj, do të shërbente për ndërgjegjësimin e fëmijëve.
Vrasja e Martin Canit ndodhi më 18 nëntor 2024, rreth 200 metra larg shkollës “Fan Noli” në Tiranë. Konflikti mes dy adoleshentëve kishte nisur disa ditë më parë brenda ambienteve të shkollës për motive të dobëta dhe, megjithëse dukej i shuar, u rindez sërish përpara ngjarjes tragjike.
