Një nga ajsbergët më të mëdhenj të regjistruar ndonjëherë, i njohur si “A23a”, po shkrin me shpejtësi ndërsa lëviz në ujërat gjithnjë e më të ngrohta të Oqeanit Jugor, kanë bërë të ditur shkencëtarët.
Ky ajsberg gjigant, i cili u shkëput nga Antarktida 39 vjet më parë dhe në atë kohë konsiderohej më i madhi në botë, kishte një masë fillestare prej gati një trilion tonësh dhe mbulonte një sipërfaqe prej afro 4,000 kilometrash katrorë – rreth 50% më e madhe se territori i Luksemburgut. Megjithatë, ndërsa ka avancuar drejt veriut, drejt zonave më të ngrohta të oqeanit, pjesë të mëdha të tij janë shkëputur. Aktualisht, madhësia e tij është reduktuar në rreth 1,770 km², me një gjerësi deri në 60 kilometra.
“Do të thoja se po i afrohet vërtet fundit të tij (…) Thjesht po kalbet nga rrënjët. Uji është shumë i nxehtë që të mbijetojë. Po shkrihet vazhdimisht,” deklaroi Andrew Meijers, oqeanograf i Shoqatës Britanike të Antarktidës.
Shkencëtarët theksojnë se rënia drastike e masës së këtij ajsbergu është një tjetër sinjal alarmi për ndryshimet klimatike dhe ndikimin e tyre të drejtpërdrejtë mbi sistemin polar dhe oqeanik të Tokës. Raportohet se brenda muajve të ardhshëm, A23a mund të zhduket plotësisht, duke mbyllur një kapitull të gjatë prej dekadash që ai ka kaluar duke lundruar në jug të oqeanit.
