Dita e dhjetë e grevës së urisë së naftëtarëve në Marinzë ka nisur me një tubim para zyrave të kompanisë “Bankers Petroleum”. Punonjësit, me pankarta në duar, kanë shprehur vendosmërinë për të vijuar protestën deri në plotësimin e kërkesave të tyre.
Sipas kreut të Sindikatës së Sektorit të Hidrokarbureve, Dritan Shahu, gjatë tubimit përfaqësues të kompanisë kanë fotografuar dhe filmuar punonjësit, një veprim që ai e cilësoi si formë presioni ndaj grevistëve. Shahu theksoi se kjo praktikë është përdorur edhe në protestat e mëparshme.
Ndërkohë, gjendja shëndetësore e 10 anëtarëve të këshillit sindikal, të cilët ndodhen në ditën e 10-të të grevës së urisë pa afat, po përkeqësohet çdo ditë e më shumë. Grevistët Sotiraq Dano dhe Dorjan Dylmishi deklaruan se janë të vendosur të shkojnë deri në fund, edhe nëse kjo do të thotë të rrezikojnë jetën e tyre.
Ata shprehën gjithashtu keqardhje për faktin që fusha naftëmbajtëse e Marinzës ndodhet pa mbikëqyrjen e tyre gjatë kësaj periudhe.
