Ndërkohë që mësimi ka nisur dhe nxënësit janë kthyer nëpër banka, bashkitë në disa qytete të vendit kanë hapur tenderë për rikonstruksionin e godinave arsimore, një ndërhyrje që vjen me vonesë, kur mund të ishte bërë gjatë pushimeve verore.
Në Gramsh, Bashkia ka vënë në dispozicion rreth 140 milionë lekë për rikonstruksionin e shkollës 9-vjeçare “35-vjetori i Çlirimit Gramsh” dhe ndërtimin e palestrës. Me kompaninë fituese tashmë të shpallur, nxënësit janë zhvendosur përkohësisht në një tjetër institucion, ndërsa punimet pritet të zgjasin 10 muaj.
Në Elbasan, shkolla “Dhaskal Todri” do të përfitojë një rikonstruksion të plotë të godinës ekzistuese, murit rrethues dhe ndërtimin e një shkalle emergjence. Fondi i akorduar nga Bashkia Elbasan është rreth 200 milionë lekë, ndërsa afati i përfundimit të punimeve është gushti i vitit 2026.
Në Bushat, Bashkia Vau i Dejës ka planifikuar të shpenzojë 120 milionë lekë për rikonstruksionin e shkollës 9-vjeçare dhe asaj të mesme, përfshirë shtesën e dy kateve. Kompania e kontraktuar do të ketë 12 muaj kohë për përfundimin e punimeve.
Ndërkohë, Bashkia Tiranë ka shpallur një tender me vlerë mbi 166 milionë lekë për blerjen e orendive dhe pajisjeve të nevojshme për procesin mësimor.
Aktualisht, në vend janë gjithsej 1,363 shkolla 9-vjeçare dhe të mesme, një rënie e ndjeshme krahasuar me vitin 2013, kur numri i tyre ishte 1,741. Kjo do të thotë se brenda pak më shumë se një dekade, janë mbyllur 378 shkolla.
Sipas të dhënave të Ministrisë së Arsimit dhe Sportit, krahas mbylljes së shkollave ka pasur edhe tkurrje të numrit të nxënësve. Në vitin 2013 kishte mesatarisht 254 nxënës për shkollë, ndërsa sot ky raport ka zbritur në 183 nxënës për shkollë.
