Dhuna dhe promovimi i saj në rrjetet sociale duket se nuk njohin kufij. Një ngjarje e fundit ka tronditur publikun: një influencer i njohur në “TikTok”, i njohur si “Diamanti Blu”, është rrahur live nga disa persona në ambientet e një lokali, ndërsa në sfond dëgjohej muzika që shoqëronte ngjarjen. Pamjet e publikuara nxjerrin në pah një fenomen shqetësues: dhuna po transmetohet dhe glorifikohet përmes rrjeteve sociale.
Në janar 2025, qeveria shqiptare vendosi një ndalim njëvjeçar të aksesit në TikTok pas tragjedisë së vrasjes së 14-vjeçarit Martin Cani, që sipas qeverisë, kishte filluar nga ndikimi i dhunës në rrjetet sociale.
Por a ka ndaluar ndonjë gjë mbyllja e platformës? Përdoruesit shqiptarë vazhdojnë të hyjnë në TikTok përmes VPN-ve, ndërsa rastet e dhunës dhe ngacmimeve online nuk kanë rënë.
Ngjarje si ajo e “Diamanti Blu” tregojnë se problemi nuk është vetëm tek TikTok. A duhet të përqendrohemi më shumë tek edukimi dhe ndërgjegjësimi social sesa tek masa teknike? Ndërhyrja ligjore dhe teknike nuk mjafton. Lufta kundër dhunës kërkon strategji të thella sociale dhe arsimore, ndërgjegjësim të familjeve dhe komuniteteve, dhe përmbajtje pozitive që të zëvendësojë modelin e dhunës që shpërndahet në rrjetet sociale.
A mundet që mbyllja e platformave të jetë thjesht një masë simbolike që nuk prek rrënjën e problemit? Dhe sa larg mund të shkojë dhuna në rrjetet sociale nëse nuk ndërhyhet në edukimin dhe vlerat e komunitetit
