Dhoma Vendore e Avokatisë Vlorë ka reaguar ashpër ndaj vendimit të fundit për zhvendosjen e Agjencisë Shtetërore të Kadastrës nga Vlora drejt Tiranës, duke e cilësuar atë si të papranueshëm, të njëanshëm dhe thellësisht të dëmshëm për qytetin, profesionistët e drejtësisë dhe qytetarët e qarkut të Vlorës.
Në një deklaratë publike, Dhoma e Avokatisë shprehet se ky vendim nuk përbën një rast të izoluar, por është vazhdim i një politike sistematike të zbrazjes institucionale të Vlorës. Sipas saj, kjo prirje ka arritur kulmin me largimin e mëparshëm të Gjykatës Administrative dhe Gjykatës së Apelit, duke e lënë qytetin pa institucione kyçe të drejtësisë dhe duke e kthyer atë në një “periferi institucionale pa peshë” në hartën juridike të vendit.
Reagimi
Dhoma e Avokatisë Vlorë shpreh indinjatën dhe kundërshtimin e saj të fortë ndaj vendimit për zhvendosjen e Agjencisë Shtetërore të Kadastrës nga qyteti i Vlorës drejt Tiranës, një vendim i papranueshëm, i njëanshëm dhe thellësisht i dëmshëm për qytetin, profesionistët e drejtësisë dhe qytetarët e këtij qarku.
Ky veprim, thekson Dhoma, nuk është i izoluar, por përfaqëson vazhdimin e një politike sistematike të largimit të institucioneve shtetërore nga Vlora, e cila ka kulmuar me largimin e Gjykatës Administrative dhe Gjykatës së Apelit, duke e shndërruar qytetin në një periferi institucionale pa peshë në hartën e drejtësisë shqiptare.
Sipas Dhomës së Avokatisë, largimi i institucioneve shtetërore nga Vlora përbën:
cenim të rëndë të aksesit në drejtësi dhe shërbime publike për mijëra qytetarë;
goditje direkte ndaj profesionit të avokatit, funksionimit të sistemit të drejtësisë dhe sigurisë juridike;
diskriminim territorial të hapur, që favorizon centralizimin ekstrem në Tiranë dhe braktis qytetet historike dhe strategjike të vendit.
Dhoma thekson se Vlora, si qytet me peshë historike, juridike dhe kombëtare, nuk mund dhe nuk duhet të trajtohet si një qytet i dorës së dytë. Vendime të tilla, të marra pa konsultim me komunitetin juridik dhe pa një analizë reale të pasojave, përbëjnë shkelje të parimeve të shtetit të së drejtës dhe të decentralizimit administrativ.
Në përfundim, Dhoma Vendore e Avokatisë Vlorë kërkon:
rishikimin e menjëhershëm dhe anulimin e vendimit për zhvendosjen e Agjencisë Shtetërore të Kadastrës;
ndërprerjen e politikës së largimit të institucioneve nga Vlora;
rikthimin e funksioneve gjyqësore dhe administrative, të domosdoshme për një qytet të këtij dimensioni dhe rëndësie.
Dhoma paralajmëron se, nëse kjo prirje vazhdon, rezervon të drejtën të ndërmarrë çdo veprim institucional dhe ligjor, në bashkëpunim me aktorë të tjerë vendorë dhe kombëtarë, për të mbrojtur interesin publik dhe dinjitetin e qytetit të Vlorës.
"Vlora nuk do të heshtë dhe nuk do të pranojë të zhvishet nga institucionet e saj”, përfundon deklarata.
