Segmenti rrugor që pritej të hapej sot në mesditë si by-pass për lehtësimin e qarkullimit në zonën “Arrat e Gurrës”, në fshatin Dragostunjë të Librazhd, ka pësuar një dëmtim të rëndë vetëm pak orë para hapjes.
Burime nga terreni bëjnë me dije se rruga dytësore, e hapur për të mundësuar kalimin provizor të mjeteve, është fundosur si pasojë e një rrëshqitjeje masive dheu. Një sipërfaqe e konsiderueshme toke ka lëvizur, duke dëmtuar seriozisht punimet e kryera ditët e fundit dhe duke e bërë segmentin plotësisht të pakalueshëm.
Për shkak të rrezikut të përkeqësimit të situatës, mjetet e firmës zbatuese janë tërhequr nga zona, ndërsa është ndaluar edhe qarkullimi i këmbësorëve. Ekziston frika për fundosje të mëtejshme të terrenit, pasi zona konsiderohet me paqëndrueshmëri të lartë gjeologjike.
Situata ka alarmuar strukturat shtetërore dhe autoritetet qendrore, ndërsa pritet një rivlerësim urgjent i kushteve gjeologjike dhe i planit të ndërhyrjes. Specialistët paralajmërojnë se ndërhyrjet në këtë terren janë të vështira dhe mbartin rrezik të lartë, duke lënë të paqartë afatin e rikthimit të qarkullimit në këtë segment strategjik.
