Këngëtarja Britney Spears ka pranuar fajësinë përmes avokatit të saj për një akuzë më të lehtë pasi u kap duke drejtuar mjetin nën ndikimin e alkoolit dhe substancave në California. 44-vjeçarja nuk u paraqit në gjykatë, ndërsa avokati i saj pranoi një marrëveshje të njohur si “wet reckless”.
Kjo i mundëson Spears të shmangë burgun dhe të dënohet me një vit provë, ndjekje të detyrueshme të një kursi për drejtimin në gjendje të dehur dhe pagesën e gjobave. Sipas prokurorisë, kjo është një praktikë standarde për persona pa precedentë, pa aksidente apo të lënduar dhe me nivel të ulët alkooli në gjak. Ajo gjithashtu ka nisur trajtim për abuzimin me substanca. Pavarësisht famës ajo po trajtohet si kushdo që thyen ligjin.
Ndërkohë, në Durrës, një drejtues mjeti në gjendje të dehur përplasi për vdekje dy fëmijë që po luanin pranë banesave të tyre, ndërsa një i tretë mbeti i plagosur rëndë. Autori rezulton të ketë qenë i ndëshkuar edhe më parë për shkelje të rregullave dhe përdorim alkooli.
Dy raste të ndryshme, por i njëjti rrezik: drejtimi në gjendje të dehur. Diku ndalet me masa ligjore përpara se të ketë viktima, diku tjetër historia mbyllet me jetë të humbura.
