Familjeve shqiptare të cilave u është refuzuar kërkesa për azil në Britaninë e Madhe mund t’u ofrohen më shumë se 3 mijë stërlina nëse pranojnë të largohen vullnetarisht nga vendi. Nisma lidhet me marrëveshjen e riatdhesimit të firmosur në vitin 2022 mes kryeministrit Edi Rama dhe ish-kryeministrit britanik Rishi Sunak.
Zv-ministri britanik për Sigurinë e Kufijëve, Alex Norris, deklaroi për mediat britanike se pagesa prej mbi 3 mijë stërlinash do të ishte “një investim i mirë për taksapaguesit”, duke shtuar se autoritetet nuk do të përballojnë më koston e strehimit për familjet që qëndrojnë në vend pas refuzimit të azilit. Norris tha se shuma e saktë mund të jetë edhe më e lartë, por nuk dha detaje.
“Për momentin mund të paguajmë rreth 3 mijë stërlina dhe nuk kërkoj ndjesë për këtë fakt. Fëmijët e azilantëve që kanë dështuar me kërkesat e tyre do të largohen nga Britania, edhe nëse kanë lindur këtu,” u shpreh ministri, duke konfirmuar se rastet do të trajtohen një për një sipas ligjeve të emigracionit.
Duke folur për “The Telegraph”, Norris sqaroi se edhe fëmijët e lindur në Britani do të përfshihen në proces, nëse prindërve u është refuzuar azili dhe nuk pranojnë të largohen vetë.
Taksapaguesit britanikë vazhdojnë të paguajnë shpenzimet e strehimit për familjet shqiptare që kanë marrë përgjigje negative për azilin, ndërsa ende refuzojnë të kthehen në Shqipëri.
Lajmi u konfirmua fillimisht nga Ministrja laburiste e Punëve të Brendshme, Shabana Mahmood, e cila në parlament njoftoi reformën e re të emigracionit dhe planet për dëbimin e rreth 700 familjeve shqiptare. Ajo po shqyrton gjithashtu mundësinë e rritjes së shumës që u jepet familjeve që pranojnë kthimin vullnetar.
