Autoriteti Rrugor Shqiptar (ARRSH) ka vendosur bllokimin e plotë të aksit Librazhd–Prrenjas për shkak të përkeqësimit të situatës në urën e zonës së njohur si “Arrat e Gurrës”.
Fillimisht ishte ndaluar qarkullimi për mjetet e tonazhit të rëndë dhe autobusët, por pas inspektimeve të fundit në terren dhe përkeqësimit të gjendjes së urës, është marrë vendimi për ndalimin total të çdo mjeti.
Drejtori i ARRSH-së, Ami Kozeli, deklaroi se gjatë 48 orëve të fundit është konstatuar përkeqësim i ndjeshëm i situatës. Sipas tij, spostimi i urës ka kaluar nga 27 centimetra në 29 centimetra brenda ditës, ndërsa nga inspektimi poshtë strukturës është vërejtur thërrmim i betonit.
“Kemi qenë në mbikëqyrje prej javësh, por përkeqësimi i fundit na detyron të bllokojmë përkohësisht trafikun, deri në zbatimin e një mase provizore me ndërtimin e një bypass-i në krah të skarpatës. Ura aktualisht nuk ofron siguri,” u shpreh Kozeli.
ARRSH ka orientuar drejtuesit e mjeteve të përdorin si rrugë alternative aksin Lozhan–Moglicë–Gramsh. Megjithatë, ky itinerar paraqet gjithashtu problematika infrastrukturore dhe nevojë për ndërhyrje.
Sipas njoftimit të Policisë, qarkullimi në aksin “Librazhd–Pogradec” do të mbetet i bllokuar deri në një njoftim të dytë. Ndalohet lëvizja e të gjitha mjeteve, përfshirë mjetet e rënda, autobusët dhe mjetet e vogla. Do të lejohen të kalojnë vetëm ambulancat, shërbimet zjarrfikëse dhe mjetet e Policisë.
Rrugë alternative për mjetet e vogla do të jetë aksi Maliq–Lozhan–Moglicë–Gramsh, në drejtim të Tiranës dhe anasjelltas.
Shërbimet e Policisë janë të pranishme në terren për monitorimin e situatës dhe orientimin e drejtuesve të mjeteve. Për çdo emergjencë, qytetarët mund të telefonojnë në numrin pa pagesë 112.
