Lëvizja në aksin rrugor Kakavijë–Janinë u bllokua plotësisht mbrëmjen e sotme, nga ora 18:00 deri në 22:00, si pjesë e protestave të fermerëve grekë që po zhvillohen në të gjithë vendin.
Ndërprerja e qarkullimit u aplikua për të gjitha automjetet, përveç mjeteve të emergjencës shëndetësore. Pavarësisht bllokimit, qarkullimi në Pikën Kufitare të Kakavijës ka qenë i qetë, pasi shumica e udhëtarëve ishin të informuar për protestat dhe shmangën kalimin në këtë fashë orare, duke evituar vonesat.
Protestat e fermerëve grekë pritet të zgjasin deri më 5 dhjetor, ndërsa ata kanë paralizuar segmente të rëndësishme rrugore, porte dhe pika doganore në të gjithë Greqinë.
Fermerët reagojnë ndaj pagesave të vonuara, mungesës së dëmshpërblimeve, kostove të larta të prodhimit dhe çmimeve të ulëta të produkteve bujqësore. Autoritetet kufitare në Kakavijë u kanë bërë thirrje udhëtarëve të planifikojnë lëvizjet në orare alternative për të shmangur problematikat nga bllokimet e vazhdueshme.
