Bllokimi i rrugës Librazhd-Prrenjas pas shembjes masive të dherave ka krijuar jo vetëm izolimin e zonës, por edhe një problem të ri për banorët: rritjen e çmimit të transportit.
Nëse më parë udhëtimi drejt Tiranës kushtonte 700 lekë të reja për biletë, tashmë qytetarët paguajnë 1000 lekë të reja. Banorët shprehen të revoltuar për këtë situatë, duke thënë se devijimi i rrugëve po i bën udhëtimet të shtrenjta dhe të lodhshme.
“Thonë do jetë 10 mijë lekë. Më parë ishte 7. Ne na merrni, merrni atë qen atje që e shikon urën me helikopter. Atje t’i bjerë ndonjë hata në Shkumbin. Për dy persona duhet të paguajmë 20. Rriten çmimet, rrugët nuk bëhen. Vetëm vjedhin. Aq sa ka vjedhur kjo qeveri nuk është vjedhur ndonjëherë kombi. Këtë rrugë e bëjmë shpesh”, tha një qytetar i revoltuar.
Shumë prej tyre shprehin shqetësimin se këto çmime mund të qëndrojnë gjatë, duke i vështirësuar jetesën, veçanërisht pensionistëve. “Ne me 70 mijë pension nuk kemi si t’ja dalim”, tha një tjetër banor.
Fugonat që lidhin Juglindjen me kryeqytetin janë detyruar të ndryshojnë itinerar, duke kaluar përmes segmentit Maliq–Lozhan–Moglicë–Gramsh, i cili është më i ngushtë, me shumë kthesa dhe i dëmtuar. Kjo ka rritur ndjeshëm kohën dhe kostot operative të udhëtimit.
