Ish-ambasadorja e Shqipërisë pranë UNESCO-s, Besiana Kadare, shkarkuar nga qeveria Rama, ka reaguar ashpër ndaj realitetit që e ka pritur në Tiranë pas rikthimit nga Parisi. Në një status të gjatë në rrjete sociale, Kadare kritikon me tone të forta ndotjen akustike në kryeqytet, të cilën e quan "të padurueshme" dhe "si askund tjetër në botë".
Duke e përshkruar jetën urbane në Tiranë si një “makth për sistemin nervor”, ajo denoncon nivelin e lartë të zhurmave – nga ndërtimet e vazhdueshme, boritë, tek muzika që shpërthen në çdo hapësirë publike. Por veçanërisht, Kadare ndalet te ajo që quan “muzikë e shpifur”, me cilësi të ulët dhe me volum të lartë që dëgjohet në çdo cep të qytetit, pa pushim.
"Nuk di ku arrijnë ta gjejnë një muzikë kaq të shpifur… kjo është ndotje akustike përtej çdo limiti, si në asnjë qytet tjetër të botës", shkruan ajo në statusin e saj.
Në një kohë që kryetari i Bashkisë së Tiranës, Erion Veliaj, dikur i njohur edhe si mik i Kadare, ndodhet në burg prej më shumë se shtatë muajsh, Kadare bën thirrje për një peticion qytetar që të nxisë një ndërgjegjësim publik dhe të kërkojë ndryshim.
"Ndoshta është koha për një peticion qytetarësh që të vëmë në lëvizje gjërat," përfundon ajo mesazhimin e saj.
