Pas ndërprerjeve dhe tensioneve në seancën e djeshme të Kuvendit, ku opozita pengoi kryeministrin Edi Rama të paraqiste programin qeverisës, Delegacioni i Bashkimit Evropian në Tiranë ka reaguar duke theksuar rëndësinë e dialogut demokratik.
“Parlamenti duhet të jetë një forum për debat konstruktiv, ku diskutohen politika dhe paraqiten pikëpamje alternative,” thuhet në deklaratën e delegacionit, që shpreh keqardhje që publiku shqiptar u privua nga e drejta për t’u informuar siç duhet mbi programin e ri qeverisës.
BE nënvizon se në kontekstin e procesit të anëtarësimit, Parlamenti luan një rol kyç në miratimin e reformave që lidhen me BE-në, dhe ky proces duhet të jetë gjithëpërfshirës dhe transparent.
Sipas Delegacionit, debati parlamentar mbi programin e qeverisë për katër vitet e ardhshme do të kishte qenë një mundësi e rëndësishme për të trajtuar objektivin e përbashkët të anëtarësimit në BE – një ambicie që përfshin të gjitha forcat politike. Ata shprehen të zhgënjyer që kjo mundësi iu mohua publikut.
Delegacioni i BE-së rikonfirmon angazhimin për të mbështetur një parlament që nxit dialog të hapur dhe përfshirës dhe bën thirrje që të gjitha partitë politike të kontribuojnë në procesin e integrimit evropian të Shqipërisë.
