Delegacioni i Bashkimit Europian në Tiranë ka reaguar ashpër ndaj nismës së qeverisë shqiptare për “paqen fiskale”, e cila pritet të miratohet në Kuvend. Në një deklaratë zyrtare, BE bën të ditur se Komisioni Europian ka ngritur “shqetësime serioze” gjatë diskutimeve me autoritetet shqiptare, përfshirë takimin e Nënkomitetit për Tregtinë, Industrinë, Doganat dhe Tatimet të mbajtur më 25-26 nëntor.
Sipas BE-së, nisma rrezikon të dekurajojë përmbushjen e detyrimeve tatimore dhe duhet të shoqërohet me garanci të forta kundër pastrimit të parave. Komisioni thekson gjithashtu se Shqipëria duhet të vazhdojë reduktimin e përjashtimeve tatimore dhe kërkon që të gjitha shqetësimet e ngritura të adresohen plotësisht përpara miratimit të paketës.
“Komisioni Europian ka diskutuar nismën për “Paqen Fiskale” me autoritetet shqiptare, përfshirë edhe gjatë takimit të Nënkomitetit për Tregtinë, Industrinë, Doganat dhe Tatimet, më 25-26 nëntor. Gjatë këtyre diskutimeve, Komisioni ngriti shqetësime serioze lidhur me rrezikun që kjo nismë të dekurajojë përmbushjen e detyrimeve tatimore. Po ashtu, ai përsëriti domosdoshmërinë që propozimi të përfshijë garanci të forta kundër pastrimit të parave, ndërkohë që vijon puna për reduktimin e numrit të madh të përjashtimeve tatimore. Komisioni pret që këto shqetësime të adresohen në mënyrë të plotë”, thuhet në reagimin e BE.
Në reagim theksohet se çdo amnisti fiskale duhet të jetë në përputhje me acquis të BE-së dhe me standardet ndërkombëtare, përfshirë Moneyval dhe FATF, si dhe të kontribuojë në luftën kundër krimit të organizuar.
Kundërshtime të forta ndaj nismës janë shprehur ditën e djeshme edhe nga Dhoma Amerikane e Tregtisë, e cila paralajmëron se dy projektligjet e propozuara do t’u falin bizneseve mbi 2 miliardë euro detyrime, gjoba dhe kamatëvonesa. Organizata kritikon mungesën e konsultimit me investitorët e huaj dhe mungesën e transparencës nga administrata tatimore.
Dhoma Amerikane nënvizon se problemet e vazhdueshme me TVSH-në, penalizimet në sektorin e energjisë dhe praktikat e kontestimit të shitjeve nën kosto tregojnë mungesë të komunikimit institucional dhe barrë të shtuar për komunitetin e biznesit.
