Banorët e fshatit Përbreg në Kukës kanë reaguar ashpër ndaj njoftimit për ndërtimin e një landfilli në territorin e tyre, duke shprehur shqetësimin për ndikimin që projekti mund të ketë mbi mjedisin dhe jetesën në zonë. Sipas tyre, vendimi është marrë pa konsultim publik dhe përfaqëson një rrezik të drejtpërdrejtë për tokat, ujërat dhe ajrin, që ata përdorin për jetesën e përditshme.
Banorët thonë se janë të vendosur të mos lejojnë zbatimin e projektit dhe kanë paralajmëruar se do të përdorin çdo mjet ligjor për ta ndalur. Kryeplaku i fshatit, Hamit Dida, shprehet se komuniteti nuk është kundër zhvillimit, por kërkon transparencë dhe një vendimmarrje të drejtë.
“Ky projekt është vendosur pa dijeninë dhe miratimin tonë. Është një vendim që nuk merr parasysh interesin e banorëve dhe rrezikon jetën në këtë zonë. Ne do të bëjmë gjithçka për ta ndalur”, tha Dida.
Nga ana tjetër, Bashkia e Kukësit mbetet në qëndrim të palëkundur mbi realizimin e projektit.
Kryebashkiaku Albert Halilaj, në një deklaratë publike, njoftoi se ndërtimi i landfillit në Përbreg është pjesë e Reformës Kombëtare për Menaxhimin e Integruar të Mbetjeve për periudhën 2025–2030.
Sipas tij, kjo është një nismë e miratuar më 28 dhjetor 2020 nga bashkitë Kukës, Has dhe Tropojë, dhe nga Këshilli Bashkiak i Kukësit.
Në deklaratën e tij thuhet se landfilli: “Do të sigurojë një menaxhim të sigurt dhe bashkëkohor të mbetjeve, do të ulë ndotjen e tokës dhe ujërave, do të përmirësojë cilësinë e jetës për banorët dhe do të krijojë baza për projekte riciklimi dhe energjie të gjelbër”. Për Halilajn, kjo përfaqëson një hap të rëndësishëm drejt një të ardhmeje më të pastër, më të qëndrueshme dhe më të favorshme për zhvillimin e turizmit malor në Kukës.
Ndërkohë, banorët mbeten në pritje të një reagimi zyrtar që të adresojë shqetësimet e tyre konkrete, ndërsa tensioni në komunitet rritet, për shkak të mungesës së dialogut të drejtpërdrejtë me institucionet vendimmarrëse./BalkanWeb/
