Banorët e Martaneshit kanë dalë sot në protestë kundër ndërhyrjeve në burimet ujore të zonës, duke kundërshtuar projektin e firmës “Teodori 2003”, e cila sipas tyre po përpiqet të devijojë ujërat e liqenit të Sopës, pjesë e basenit ujëmbledhës të Matit. Sipas banorëve, ky proces do të shkaktonte pasoja të rënda mjedisore dhe do të linte pa ujë katër fshatra të zonës.
Protestës së banorëve iu bashkuan edhe përfaqësues të Lëvizjes BASHKË, të cilët deklaruan mbështetje për komunitetin dhe e cilësuan situatën si një “krim mjedisor”. Në fjalën e tyre, ata akuzuan qeverinë dhe pushtetin vendor për bashkëpunim me interesa oligarkike, duke paralajmëruar përshkallëzim të protestave në nivel kombëtar.
"Ky projekt është një grabitje e burimeve natyrore dhe do të dënojë me thatësirë fshatrat e Martaneshit. Thirrja jonë është për bashkim dhe protesta të menjëhershme edhe përpara Kryeministrisë, për të ndaluar këtë proces”, u shprehën përfaqësues të Lëvizjes.
Banorët dhe mbështetësit e tyre kërkuan ndërhyrjen e institucioneve për të ndalur projektin, duke paralajmëruar se do të vazhdojnë protestat deri në mbrojtjen e plotë të burimeve ujore të zonës.
