Pas publikimit të dy artikujve të gazetës Daily Mail, një në vitin 2022 dhe një tjetër katër ditë më parë, të cilët përshkruajnë realitetin e trishtë të Hasit dhe rrugët e emigrimit të shqiptarëve drejt Britanisë, Ambasada e Shqipërisë në Londër ka zgjedhur të reagojë – jo për gjendjen sociale, as për mungesën e vizave, as për trafikimin, por… për stilin e shkrimit të gazetës.
Në një reagim ku ironia është më e theksuar se analiza, ambasada kritikon Daily Mail-in për “pseudo-gazetari dembele”, për riciklim të të njëjtit reportazh dhe për përdorim emocionesh banale. Gazetarja Sue Reid akuzohet për fiksim me Hasin dhe për përdorimin e klisheve mbi shqiptarët si emigrantë dhe të lidhur me krimin. E vetmja gjë që mungon në reagimin e ambasadës është… një fjalë për Hasin vetë.
Në vend që t’i drejtohet institucioneve britanike për nevojën e rrugëve të sigurta emigrimi, apo të propozojë politika që e bëjnë Hasin më shumë se një “qytet fantazmë”, ambasada shqiptare preferon të japë leksione gazetarie nga larg – si një kritik letrar që nuk mban asnjë pérgjegjësi për politikat e shtetit shqiptar.
Ndërkohë, shqiptarët e Hasit vazhdojnë të nisen, Daily Mail vazhdon t’i fotografojë, dhe qeveria shqiptare – përfaqësuar me zell në Londër – bën çmos të mos flasë për arsyet pse ikin.
https://www.facebook.com/share/p/16pt9TTbR3/?mibextid=wwXIfr
