Gjatë 24 orëve të fundit janë evidentuar 18 vatra zjarri në vend, nga të cilat 11 janë shuar, ndërsa 7 vatra mbeten ende aktive.
Në Qarkun Vlorë, në fshatin Navaricë të njësisë administrative Dhivër në bashkinë Finiq, situata mbetet problematike për shkak të erës. Forcat në terren po marrin mbështetje nga helikopteri i Forcës Ajrore dhe avioni kroat Canadair, për të parandaluar përhapjen e flakëve.
Në Qarkun Fier, në fshatin Lofkënd të njësisë Qendër Dukas në bashkinë Mallakastër, pjesa më e madhe e vatrës është izoluar falë ndërhyrjes nga ajri dhe punës së forcave në terren, por zjarri vijon në pjesën jugore dhe veriperëndimore. Në terren janë angazhuar 25 efektivë të Forcave të Armatosura dhe strukturave të bashkisë.
Në Qarkun Lezhë, në fshatin Malaj Epërm, bashkia Mirditë, zjarri po vazhdon në një sipërfaqe pyjore me pishë, lis dhe bimësi të dendur në një terren të vështirë për ndërhyrje me mjete ujë hedhëse. Në ndihmë janë angazhuar 63 forca operacionale, që punojnë kryesisht për krijimin e brezave ndarës për të ndalur përhapjen. Aktualisht nuk ka rrezik për zonat e banuara.
Në Qarkun Dibër, në vendin e quajtur “Mali i Allushit” në fshatin Plani Bardhë të bashkisë Klos, vatra e zjarrit e riaktivizuar po mbahet nën kontroll dhe nuk paraqet rrezik për përhapje.
Në Qarkun Elbasan, në fshatin Lleshaj të njësisë Poroçan në bashkinë Gramsh, zjarri po monitorohet nga Shërbimi Pyjor për parandalimin e riaktivizimeve.
Në Qarkun Tiranë, në malin e Bërzhitës, bashkia Tiranë, vatra është vënë nën kontroll dhe po shkon drejt izolimit, ndërkohë që forcat po vijojnë punën për shuarjen përfundimtare.
Gjithashtu, në Tepelenë, midis fshatrave Turan dhe Dukaj, po punohet intensivisht për shuarjen e zjarrit.
Autoritetet dhe forcat e emergjencës vijojnë angazhimin maksimal për kontrollin dhe shuarjen e plotë të zjarreve për të parandaluar dëme të mëtejshme në natyrë dhe zona të banuara.
