Aktivisti shqiptar Baki Goxhaj ka njoftuar përmes një video-mesazhi për VNA se i është bashkuar misionit ndërkombëtar Freedom Flotilla Coalition, flotilës humanitare që synon të thyejë bllokadën e Gazës dhe të krijojë një korridor ndihmash për popullsinë palestineze.
Sipas Goxhajt, flotila e këtij viti është më e madhja e organizuar deri më sot, me rreth 60 anije dhe pjesëmarrës nga 50 shtete të ndryshme.
“Jam bashkuar misionit global Freedom Flotilla Coalition, i cili synon të thyejë rrethimin gati 3-vjeçar të Gazës, të krijojë një korridor ndihmash humanitare dhe të rrisë solidaritetin mbarëkombëtar me popullin e vuajtur të Palestinës”, shprehet ai.
Aktivisti shqiptar e cilëson pjesëmarrjen e tij si një reagim personal ndaj situatës në Gaza dhe njëkohësisht si kritikë ndaj qëndrimit të qeverisë shqiptare ndaj Izraelit.
“Pjesëmarrja në këtë mision buron nga një nevojë e brendshme për të bërë diçka përballë mizorive që kemi 2 vite e gjysmë që shohim dhe vjen si një shuplakë për maskarallëqet e qeverisë tonë, e cila nuk na përfaqëson aspak me marrëveshjet që bën me qeverinë genocidale të Izraelit”, deklaron Goxhaj.
Ai shpreh gjithashtu shpresën që pjesëmarrja e tij në këtë mision të shërbejë si një thirrje për reagim edhe për shqiptarët.
“Shpresoj që pjesëmarrja ime këtu të shërbejë dhe si një zgjim për popullin shqiptar që të marrin frenat e vendit në dorë dhe t’i thonë jo maskarenjve”, thotë ai.
Freedom Flotilla Coalition është një nismë ndërkombëtare aktivistësh dhe organizatash që prej vitesh organizon misione detare simbolike dhe humanitare drejt Gazës, në përpjekje për të sfiduar bllokadën izraelite dhe për të tërhequr vëmendjen ndërkombëtare mbi situatën humanitare në territorin palestinez.
