Asociacioni i Gazetarëve të Shqipërisë reagon ndaj njoftimit të vonuar për tryezën e Kodit të ri Penal. AGSH kërkon më shumë seriozitet dhe transparencë nga institucionet.
Asociacioni i Gazetarëve të Shqipërisë shpreh shqetësimin për mënyrën e njoftimit të medias në lidhje me aktivitetin e nesërm (4 shtator 2025) të Ministrisë së Drejtësisë dhe Grupit të Punës për Kodin e ri Penal.Sipas njoftimit në tryezë do të diskutohet për kodin e ri penal me gazetarët dhe median por ai është dërguar vetëm 15 orë përpara zhvillimit të tryezës, çka tregon mungesë serioziteti dhe transparence në raport me rolin e gazetarëve por edhe me mundësinë për diskutime të thelluara.
Ky praktikim e bën të pamundur për shumë redaksi dhe gazetarë organizimin e pjesëmarrjes profesionale, pasi kërkon kohë përgatitje, verifikim dhe caktim burimesh njerëzore e teknike.
Njoftime të tilla të minutës së fundit, për një proces kaq të rëndësishëm si diskutimi i Kodit të ri Penal, tregojnë se media shihet më shumë si dekor, sesa si partner i vërtetë.
Ne i rikujtojmë Ministrisë së Drejtësisë se transparenca me publikun kalon përmes medias, dhe një proces gjithëpërfshirës konsultimi nuk mund të realizohet duke informuar gazetarët në minutën e fundit, sidomos kur ne jemi grup interesi.
Ftojmë institucionet që të tregojnë më shumë seriozitet dhe respekt ndaj rolit të medias, duke garantuar njoftime të rregullta, të plota dhe me kohë të mjaftueshme për të mundësuar pjesëmarrje reale dhe diskutime përmbajtësore.
AGSH thekson se do të përdorë platformën e konsultimit Publik për të dërguar komentet tona për Kodin e ri penal.
