Një ngjarje e rëndë është shënuar në Pogradec, ku një i moshuar është vënë në pranga nën akuzën e abuzimit seksual me një të mitur 12-vjeçare. Ngjarja u zbulua vetëm pas një vizite mjekësore, ku rezultoi se e mitura është në javën e 22-të të shtatzënisë.
Autori i dyshuar, i cili është baba i katër fëmijëve të rritur dhe gjysh i disa nipërve e mbesave, kishte njohje të afërt me familjen e viktimës, fakt që dyshohet se e ka shfrytëzuar për të kryer krimin. Rasti tronditës u zbulua pasi prindërit e vajzës, të shqetësuar nga ndryshimet fizike që kishin vërejtur te e bija, e dërguan atë për kontroll mjekësor në spitalin e Korçës, ku mjekët konfirmuan shtatzëninë.
Nga hetimet paraprake rezulton se 67-vjeçari e ka abuzuar të miturën dhe e ka kërcënuar vazhdimisht që të mos tregonte, ndërsa pas zbulimit të ngjarjes, vajza ka rrëfyer gjithçka në prani të psikologut.
