Numri i studentëve të regjistruar në degët e shkencave të natyrës vijon të bjerë, me 600 studentë më pak këtë vit krahasuar me një vit më parë. Ky trend shqetësues rrezikon seriozisht të ardhmen e mësimdhënies në lëndë bazë si fizika, matematika, kimia dhe biologjia – degë ku mungesa e mësuesve tashmë ndihet në shkollat publike.
Në një deklaratë për mediat, organizata Qëndresa Qytetare paralajmëron se mungesa e arsimtarëve të shkencave ekzakte nuk mund të zëvendësohet nga inteligjenca artificiale, duke theksuar se cilësia në arsim nuk ndërtohet mbi improvizime teknologjike apo masa emergjente.
Edhe pse Rektori i Universitetit të Tiranës, Artan Hoxha, deklaroi me krenari se numri i përgjithshëm i të regjistruarve është në rritje, Qëndresa Qytetare nënvizon se kjo vjen jo si tregues i përmirësimit, por si pasojë e liberalizimit të hyrjes në universitet, rritjes së fenomenit të kopjimit në Maturë, si dhe mbylljes së disa universiteteve në rrethe, që kanë shtyrë më shumë të rinj të orientohen drejt Tiranës.
“Rënia e interesit për shkencat ekzakte është alarmante. Ky është një sinjal që kërkon ndërhyrje të menjëhershme nga Ministria e Arsimit,” – thuhet në deklaratën e Qëndresës Qytetare, ku theksohet gjithashtu se bursat aktuale për degët e mësuesisë nuk mjaftojnë, dhe kërkohet rishikim urgjent i pagave për mësuesit e shkencave të natyrës, për të bërë këto profesione më tërheqëse për të rinjtë.
