Parkimi në Tiranë është bërë prej kohësh një mision për milionerë. Kjo dihet. Por parkimi pranë Liqenit ka shpikur formulën e vet: nuk ka rëndësi nëse e lë makinën 5 minuta apo 3 orë. Tarifa është e njëjtë – 5000 lekë të vjetra.
Kur kërkon faturën, të shohin sikur po kërkon një nder të madh. Por pikërisht fatura tregon edhe sekretin e vogël të këtij biznesi të madh: parkimi që mbledh para gjithë ditën rezulton i regjistruar si biznes i vogël, pra pa TVSH.
Ndërkohë, tatimet dhe bashkia shohin me qetësi se si qytetarët paguajnë në mes të ditës. Halli i madh duket se është diku tjetër: të mos kalojë ndonjë fshatar që shet qepë apo vezë në rrugë, sepse atij i nxirret jeta brenda pesë minutash.
