Nesër nis zyrtarisht viti i ri shkollor 2025–2026 në të gjithë vendin, ku rreth 345 mijë nxënës do të ulen në bankat e shkollës. Përmes një postimi në rrjetet sociale, Ministria e Arsimit ka bërë të ditur se në total do të jenë 31 mijë mësues në shërbim të procesit mësimor, ndërsa këtë vit është përforcuar mbështetja për nxënësit me aftësi të kufizuara. Konkretisht, janë angazhuar 2,260 mësues ndihmës, një rritje me 150 më shumë se një vit më parë.
Një situatë e veçantë është shënuar në Korçë, ku viti i ri shkollor nis me një rënie të ndjeshme të numrit të nxënësve. Krahasuar me një vit më parë, janë 3,726 nxënës më pak, duke e ulur shifrën nga 21,080 në 17,354. Kjo rënie ka bërë që disa shkolla në qytetin e Korçës të bashkohen, ndërsa dhjetëra klasa të para nuk janë hapur, pasi nuk ka pasur asnjë regjistrim. Sipas nënkryetarit të sindikatës së mësuesve në Korçë, reduktimi me gati një të katërtën e nxënësve është një tregues alarmant që kërkon ndërhyrje emergjente në sistemin arsimor. Rënia e numrit të nxënësve reflektohet drejtpërdrejt edhe tek mësuesit, shumë prej të cilëve mbeten pa ngarkesë të plotë mësimore. Një pjesë e tyre pritet të sistemohen si mësues ndihmës ose të angazhohen në programe pas-shkollore.
