Kombëtarja shqiptare zbret mbrëmjen e sotme në fushë për ndeshjen miqësore ndaj Izraelit, një sfidë që do të luhet në stadiumin “Air Albania”, me fillim në orën 20:00.
Takimi shënon nisjen e një etape të re për përfaqësuesen kuqezi, pasi në pankinë do të debutojë trajneri italian Rolando Maran. Ai merr drejtimin e skuadrës pas largimit të Sylvinhos, i cili mbylli eksperiencën e tij trevjeçare e gjysmë në krye të Shqipërisë.
Maran ka bërë menjëherë disa ndryshime në formacionin titullar. Anis Mehmeti fiton besimin e trajnerit dhe do të aktivizohet nga minuta e parë, ndërsa Ylber Ramadani rikthehet si titullar në mesin e fushës. Ndërkohë, Juljan Shehu e nis takimin nga stoli.
Nga ana tjetër, kuqezinjtë do të duhet të përballen me një mungesë të rëndësishme, atë të Myrto Uzunit, i cili nuk është i gatshëm për këtë sfidë për shkak të problemeve shëndetësore.
