Tre orë para mbylljes së votimit në Kosovë, KQZ njofton se pjesëmarrja e qytetarëve ka shkuar në 29%. Nga 1,999,204 qytetarë me të drejtë vote, 581,034 prej tyre kanë ushtruar të drejtën e tyre qytetare.
Procesi në përgjithësi ka vijuar i qetë ndërsa është regjistruar vetëm një incident në një qendër votimi. Në Zhegër të Komunës së Gjilanit, një votues ka shkuar me babanë për të ndihmuar dhe ka nisur një përplasje verbale me votues të tjerë.
Ndërsa janë raportuar disa probleme të tjera me mungesë të energjisë elektrike në 3 qendra votimi në komunën e Skënderajt, 2 në komunën e Malishevës dhe 2 qendra të tjera në Novobërdë dhe Obiliq.
Më herët kanë votuar edhe presidentja Vjosa Osmani dhe krerët e partive politike. Osmani votoi në Prishtinë ndërsa uroi që procesi të zhvillohet në mënyrë të qetë, të rregullt dhe demokratike.
Kandidati i Lëvizjes Vetëvendosje për kryeministër, Albin Kurti, votoi në Prishtinë rreth orës 09:40. Kryetari i Partisë Demokratike të Kosovës, Bedri Hamza, ushtrua të drejtën e votës në Mitrovicën e Jugut rreth orës 10:00, duke bërë thirrje për pjesëmarrje të lartë qytetare.
Kandidati i Lidhjes Demokratike të Kosovës për kryeministër, Lumir Abdixhiku, votoi rreth orës 10:45 në Prishtinë. Ndërsa, kryetari i Aleancës për Ardhmërinë e Kosovës, Ramush Haradinaj, votoi rreth orës 09:00 në Gllogjan.
Kujtojmë se zgjedhjet parlamentare të shkurtit të këtij viti, nuk arritën të prodhojnë një shumicë për formimin e qeverisë së re, duke krijuar një krizë politike e cila çoi në zgjehdjet e parakohshme.
