Lidhja Demokratike e Kosovës do të mbajë të shtunën në orën 12:00 mbledhjen e Këshillit të Përgjithshëm, ku pritet të merren disa vendime të rëndësishme në prag të zhvillimeve politike dhe zgjedhore në vend.
Në fokus të mbledhjes do të jetë nominimi i kandidatit të LDK-së për postin e kryeministrit, një vendim që pritet të përcaktojë edhe strategjinë politike të partisë për periudhën në vijim.
Po ashtu, gjatë takimit do të diskutohet edhe për hartimin e listës së kandidatëve për deputetë, me strukturat e partisë që pritet të japin propozimet dhe qëndrimet e tyre për përfaqësimin në zgjedhje.
Një tjetër çështje e rëndësishme në agjendë është edhe shqyrtimi i mundësisë së bashkëpunimit me presidenten Vjosa Osmani, temë që prej kohësh ka nxitur diskutime në skenën politike kosovare.
Vendimet që do të dalin nga ky takim pritet të kenë ndikim të rëndësishëm në pozicionimin politik të partisë në muajt e ardhshëm.
Para disa ditësh kreu i LDK, Lumir Abdixhiku njoftoi se kishte arritur një marrëveshje me Vjosa Osmanin që ajo të bëhej pjesë e listës së partisë që ai drejton. I pyetur nëse Osmani mund të udhëhiqte listën e kësaj force politike, Abdixhiku u shpreh se për të nuk ka asnjë problem. Gjithashtu emra të ndryshëm të listë Guxo, lëvizje politike e krijuar nga Vjosa Osmani pas largimit nga LDK, e cila aktualisht është në koalicion me VV kanë deklaruar se do të ndjekin ish presidenten në rrugëtimin e saj politik.
