Presidentja e Kosovës, Vjosa Osmani, ka njoftuar se të enjten i ka dërguar në Kuvend amendamentet kushtetuese me të cilat propozon që presidenti të zgjidhet drejtpërdrejt me votë nga populli.
Sipas saj, këto amendamente janë hartuar që në vitin 2011, por nuk janë miratuar asnjëherë.
“ZGJEDHJE TË DREJTPËRDREJTA PËR PRESIDENT! Duke parë dështimet e njëpasnjëshme në zgjedhjen e Presidentes/it, sapo kam proceduar në Kuvend amendamentet kushtetuese për zgjedhje të drejtpërdrejta të Presidentes/it, të cilat ishin hartuar nga Komisioni për amendamentimin e Kushtetutës në vitin 2011. I ftoj të gjitha partitë politike që të votojnë këto amendamente kushtetuese. Tash e tutje, le të flasë populli!”, ka shkruar Osmani në Facebook.
Çdo ndryshim kushtetues kërkon miratimin e dy të tretave të të gjithë deputetëve të Kuvendit, përfshirë edhe dy të tretat e deputetëve që përfaqësojnë komunitetet.
Nisma e Osmanit vjen në një moment kur ajo po hyn në muajin e fundit të mandatit presidencial. Ndërkohë, nga partia në pushtet nuk janë siguruar nënshkrimet për një mandat të dytë për të, pasi është propozuar kandidatura e Glauk Konjufca për postin e presidentit.
