Lëvizja Lëvizja Vetëvendosje ka ftuar partitë opozitare Partia Demokratike e Kosovës dhe Lidhja Demokratike e Kosovës që të bashkëpunojnë në propozimin e tre kandidatëve për President të Kosovës.
Në një njoftim zyrtar pas mbledhjes së Kryesisë, partia në pushtet thotë se ky propozim vjen me qëllim shmangien e një procesi të përsëritur zgjedhor dhe garantimin e stabilitetit institucional në vend.
Sipas Vetëvendosjes, nga kjo marrëveshje e mundshme do të tërhiqeshin kandidaturat aktuale të Glauk Konjufcës dhe Fatmire Mulhaxha-Kollçakut, ndërsa do të siguroheshin të paktën 90 nënshkrime nga deputetët e Kuvendit të Kosovës për tre kandidatët e përbashkët.
Partia në pushtet kërkon që opozita të propozojë tre emra konsensualë për postin e presidentit, duke theksuar se figurat duhet të jenë unifikuese, me integritet të lartë dhe jashtë skenës aktuale politike.
“Ftojmë PDK-në dhe LDK-në që së bashku të propozojnë tre emra, nga të cilët do të mund të zgjidhet Presidenti i ri”, thuhet në njoftim.
Vetëvendosje thekson gjithashtu se pret përgjigje nga partitë opozitare deri të dielën në mbrëmje, për shkak të afateve kushtetuese dhe nevojës për të shmangur bllokimin institucional.
Në deklaratë, partia në pushtet e cilëson situatën aktuale si të ndjeshme politikisht dhe apelon për bashkëpunim mes forcave politike për të gjetur një zgjidhje të përbashkët.
